បារាំង៖ បាតុកររាប់សែននាក់បានដើរដង្ហែរ និងវាយលុកតាមដងផ្លូវនានានៅក្នុងប្រទេសបារាំងនាថ្ងៃព្រហស្បតិ៍នេះ នៅក្នុងការតវ៉ាមួយផ្សេងទៀត រួមជាមួយនិងការធ្វើកូដកម្មប្រឆាំងនឹងកំណែទម្រង់ប្រាក់សោធននិវត្តន៍របស់លោកប្រធានាធិបតី Emmanuel Macron ខណៈដែលសហជីពព្យាយាមរក្សាសម្ពាធនៅមុនការសម្រេចសេចក្តីដ៏សំខាន់មួយរបស់តុលាការ។

ការប៉ះទង្គិចគ្នាបានផ្ទុះឡើងនារសៀលនេះនៅតាមបណ្ដាទីក្រុងជាច្រើន រួមទាំងនៅរដ្ឋធានីប៉ារីសដែលជាកន្លែងដែលក្រុមបាតុករជ្រុលនិយមមួយចំនួនបានដុតបំផ្លាញរបស់របរ និងទីកន្លែងសំខាន់ៗមួយចំនួនទៀត។ លោកប្រធានាធិបតី Macron បច្ចុប្បន្នកំពុងបំពេញទស្សនកិច្ចនៅក្នុងប្រទេសចិន កំពុងប្រឈមមុខនឹងបញ្ហាដ៏ធំបំផុតនៃការដឹកនាំអាណត្តិទីពីររបស់លោក ជុំវិញការកែប្រែសោធននិវត្តន៍រួមជាមួយនឹងការបង្កើនអាយុចូលនិវត្តន៍ពី ៦២ឆ្នាំទៅ ៦៤ឆ្នាំ ជាអាទិ៍។ 

ភាគីទាំងអស់នៅក្នុងការប្រឈមមុខគ្នាកំពុងរង់ចាំសាលក្រមនៅថ្ងៃទី១៤ ខែមេសាខាងមុខនេះ ស្តីពីសុពលភាពនៃកំណែទម្រង់ដោយក្រុមប្រឹក្សាធម្មនុញ្ញរបស់ប្រទេសបារាំងដែលមានអំណាចក្នុងការបញ្ចេញចោលនូវច្បាប់មួយចំនួន ឬច្បាប់ទាំងអស់ដែលបានអនុម័តរួចរាល់។ ខណៈពេលដែលសមាជិកក្រុមប្រឹក្សានឹងធ្វើការសម្រេចចិត្តស្របតាមការបកស្រាយយ៉ាងតឹងរឹងនៃច្បាប់នោះ ក្រុមសហជីពនៅតែចង់បង្ហាញពីចលនានៃការតវ៉ាដែលជាសញ្ញាបង្ហាញថាកម្លាំងតវ៉ានៅតែមានសកម្មភាពដដែល។ 

គួរឱ្យដឹងថា បាតុកម្មបានធ្វើឡើងនៅទូទាំងប្រទេស ដោយប្រជាជនបាននាំគ្នាលើកស្លាកសញ្ញានានា ឬមានការគ្រវីទង់ជាតិពីទីក្រុងប៉ារីស ឆ្ពោះទៅកាន់ទីក្រុង Montpellier និង Marseille ស្ថិតនៅភាគខាងត្បូង។ ដោយឡែក បើតាមទិន្នន័យពីសហជីពមួយដែលមានឈ្មោះថា CGT បានអះអាងថាមានមនុស្សយ៉ាងហោចណាស់ ៤០០,០០០នាក់បានចេញមកធ្វើការបាតុកម្មតវ៉ាចំពោះច្បាប់នេះ៕